D2 Place周末市集重開 做足防疫措施兼寬減租金

因為疫情影響，部分商場或舖頭都縮短營業時間或關門。好似羅氏集團旗下D2 Place，上月就暫停所有周末市集，不過黛安收到風，周末市集喺3月中下旬重開喇。集團貼心安排一系列防疫措施，例如會喺市集入口幫檔主同客人量體溫，場內提供酒精搓手液，參與活動人士都要戴口罩，商場內仲設多部空氣清新機，務求大家行得開心又放心。

此外，黛安聽公關姊妹講，羅氏集團喺舊年社會事件期間，已率先寬減D2 Place租戶嘅租金，最近疫情影響唔少商戶生意，佢哋決定繼續提供租金寬減措施，希望同租戶共度時艱。D2 Place商場嘅防疫措施做到足，既體恤租戶又支持本地原創，真係好值得畀個Like，黛安都要去支持下佢哋。