《龍珠》抗疫@無限想像

「播《龍珠》有助抗炎」李居明大師此話一夜成為熱話，為嚴峻「疫」境帶來一個輕鬆話題，以及無限想像。《龍珠》80年代於TVB配音播映，甚受歡迎，當年唱香港版主題曲的是張崇基、張崇德兄弟，張崇德稱最近不少網民提議他兩兄弟到各區商場巡唱，集氣抗疫，且看哪個商場早着先機，尤其大家正在計劃Recovery Campaign（復甦公關），張氏兄弟隨時接job接到手軟。

香港人轉數快過高官，生意人定會食住《龍珠》話題。例如蘭桂坊可搞個抗疫特備萬聖節2.0龍珠化粧大派對，大家《龍珠》角色上身，扮演孫悟空、無限、莊子、龜仙人、阿樂、占星婆婆等等，有如長洲飄色，可吸引不少報道作免費宣傳。各大商場亦可考慮搞個類似派對，或不停播《龍珠》主題曲及安排《龍珠》角色與客人合照。石板街專賣化粧舞會衫的店舖要入定《龍珠》角色的衣飾了。童裝公司推出《龍珠》圖案衫標榜有助防疫，父母買個安心多會幫襯。另外，推出《龍珠》figure，當作吉祥物，用來鎮宅，不無市場。龍珠島個名有如抗疫島，可大賣樓盤廣告。各劇團快快推出《龍珠》舞台劇版，李居明則推出《龍珠》大戲版，以抗疫作賣點，應有市場。而大朋友小朋友更有大條道理打《龍珠》遊戲抗疫。相信《龍珠》版權很快會吊高來賣。

（本欄逢周一、三、五刊登）