龔慈恩吳岱融 當虎媽遇上大細路爸爸

吳岱融和龔慈恩繼《牛下女高音》後，再次在《大醬園》飾演一對夫妻，無論是時裝抑或民初劇，同樣默契十足，成為近年合作最多次數的熒幕情侶之一。現實生活中，兩人亦是好友，各自有家庭，而子女年紀相若，戲外總是離不開育兒經。

吳岱融和龔慈恩原來已經是第五次演夫妻，早於1988年古裝劇《嬴單傳奇》就演一對，沒想到「失散」多年，一重逢就連演四次，龔慈恩說︰「我發現自己因為演戲，仔女愈來愈多，後生時收集『男朋友』，依家收集緊啲仔仔女女。」在《大醬園》中，萬啟山（吳岱融飾）和夫人（龔慈恩飾）因為沒有男丁被迫買仔，以遵照父親之命保住大當家的位置，囝囝萬卓楓（何廣沛飾）不是做生意的材料，萬啟山沒有迫他接手醬園，反而讓二弟的囝囝萬卓楠（黃嘉樂飾）接手。

教仔重任太太主導

現實生活中，吳岱融和龔慈恩是否如劇中一樣是慈父仁母，或是社會愛標籤的「惡爸」、「虎媽」呢？兩人認為對方又是一位怎樣的家長？

吳岱融和太太鍾淑慧（Lily）一向恩愛，囝囝吳政樺（Justin）已經22歲，想不到平時外貌嚴肅的吳岱融，將教育的工作交給太太，自己卻原來主要負責玩樂部分。龔慈恩說︰「佢囝囝真係好乖，Lily教得好好，這個當然是Lily的功勞。佢個仔好有禮貌，依家時下年輕人唔容易做到，而且好尊重爸爸媽媽，好願意學習。如果岱融哥不說話時，樣子有些威嚴，個仔可能會有少少驚你，但你又會成日同個仔玩。」

龔慈恩的19歲女兒林愷鈴和16歲囝囝林卓毅同是受矚目的星二代，特別是林愷鈴遺傳媽媽的美人胚子，近年已經正式入行拍電影、做模特兒，不少人都羨慕兩母女走在一起好似兩姊妹一樣。吳岱融說︰「我覺得佢對仔女好嚴厲，錫當然係必然。佢個女好精靈，不過佢對仔女要求好高，就算不忍心都要嚴厲，因為想仔女將來能夠有成就。」

子女幼年管教嚴厲

龔慈恩解釋自己在不同階段有不同手法，孩子年幼時管教會較嚴厲，現時子女長大，相處有如朋友一樣，她說︰「每個人性格唔同，要因應佢哋性格去處理，唔係用死一種方法，做父母的，無論年紀幾大，一直都係學習中。」

養兒一百歲，長憂九十九，就算子女長大了，龔慈恩仍落心落力去照顧他們，特別是近來被爆已經跟丈夫離婚，獨自一人照顧兩名子女，工作之餘，她都希望多花時間跟他們聊天，了解和關心他們的生活。

子女逐漸長大，身為家長的亦可以慢慢放手，吳岱融和龔慈恩都選擇重拾當初的夢想，龔慈恩說︰「小朋友成長後有他們的生活，我會將重心放回自己身上，努力工作發展事業。」人到中年，角色由少女變成人母，由小生變成白髮中佬，在角色上的發揮卻是愈來愈多，吳岱融笑言︰「呢個白髮造型，我返嚟TVB呢幾年，都唔使再染番。好多中年角色發揮得幾好玩。呢個年紀的演員，有些已經上岸，有些又賺夠，唔想工作咁辛苦。」

服裝︰magazzinggroup（龔慈恩）

撰文︰楊安莉

編輯︰黃寶恩

美術︰梁政敏

攝影︰楊嘉傑、潘卓忻