獲Kelly蘇施黃賀壽 鍾楚紅「登六」連場飯局

「一代女神」鍾楚紅（紅姑）前日踏入60歲，她先與蘇施黃搞生日飯局，再獲陳慧琳（Kelly）、蔡瀾等好友為她慶祝，即使面對新冠肺炎肆虐，亦難得與好友聚一聚。昨午紅姑在微博發文祝願大家身體健康，粉絲們恭賀她靚爆「登六」！

鍾楚紅昨午在微博發相，原來日前由其經理人鍾珍安排慶生飯局，座上客包括陳慧琳、蔡瀾及奚仲文等好友。相中見壽星女與眾人大合照，表現風騷，而且壽包、生日蛋糕兼備。紅姑自知很久沒有在微博出Po，她留言︰「謝謝大家的祝福，今年的願望是祝願大家身體健康，平安！＃冒個泡（意指不再潛水）」非常鬼馬。

至於好友蘇施黃前日亦於社交網Po上為紅姑慶生的靚相，紅姑面對七彩繽紛的生日蛋糕笑到見牙唔見眼。阿蘇還上載紅姑的手藝作品︰「壽星女近年學日本『金繼』，越嚟越叻，手功非常好，睇下佢啲手藝。」其實，「金繼」是日本一項專門修補陶器的傳統技術，足見紅姑除了鍾情攝影，亦愛學習多種手藝來自我增值。

阿蘇牛一收「玉鮑魚」

此外，已離開商台轉做YouTuber的阿蘇，從此變身「教煮蘇」，昨日是她的65歲牛一，阿蘇留言︰「今日（前日）係鍾記（紅姑）正日，不過我一樣有禮物收。我鍾意嗰幾嚿鮑魚，係玉嚟㗎！」而早前她亦在FB晒新手機，由另一半金燕玲所送贈︰「銀毛玲（金燕玲）送的生日禮物。我決定今年18號才慶祝生日，因為2020年係一個新開始、新挑戰，是一個新生日，請大家2月18日才同我講生日快樂。」網友紛紛留言向兩位壽星女送上祝福；有人亦大讚60歲的紅姑依然少女味滿瀉。

撰文︰Steven、Pat

協力︰Jennie

編輯︰陳禮恒

美術︰Simon