驚流感多過新肺炎 陳啟泰：唔好過分緊張

陳啟泰與項明生前晚錄影《「1000萬求一路」尋回昔日香港總決賽》，提到武漢肺炎持續攻港，陳啟泰認為港人經歷沙士後會對疫情更謹慎，但他坦言每年流感死幾百人，情況亦同樣嚴重，所以呼籲大家小心之餘，亦不必對武漢肺炎過分緊張，心理上會較舒服。

陳啟泰前晚擔任節目主持，他表示前晚原本有200觀眾入場，但因疫情關係，大會減至數十名觀眾。他又直認工作受疫情影響，部分內地工作要取消或延期：「我呢幾個月都係得今晚（前晚）呢個工作如期進行。」

如今疫情未受控，令香港人心惶惶，陳啟泰有感港人對今次疫情十分謹慎：「我覺得一定要小心，但唔好過分緊張；正如我哋每年都有得打流感針，但每年流感都死幾百人，一定嚴重過依家（新肺炎）暫時嘅情況，但美國H5N1死萬幾人都好少人講。」他坦言對流感有較大感觸，因有兩個朋友都因流感離世：「所以我哋謹慎防備新型冠狀病毒之餘，都要將平時嘅流感擺喺正常位置，其實應該驚流感多啲，如果輕重分得好啲，大家心理上都舒服啲。」

項明生古巴撲口罩

同場的項明生早前帶旅行團到古巴及墨西哥，因肺炎疫情爆發，所以臨時改行程，在當地撲口罩及酒精：「不過內地人早過我哋搶購，所以當地人唔賣口罩畀華人，最後我哋靠導遊買到八盒，一人分半盒口罩，回程喺多倫多買酒精。」他又指入境古巴時，被海關截停問話：「我解釋咗我哋護照同內地唔同，亦講明無人返過大陸，但都要見醫生探熱。」

撰文︰Pauline

攝影︰林良明

編輯：李潔盈

美術：梁政敏