婚期無受疫情影響 鄭俊弘笑何雁詩露背：怕佢凍親

鄭俊弘與未婚妻何雁詩前晚錄影節目《流行經典50年》，二人將於今年底拉埋天窗，雖然新型冠狀病毒肺炎肆虐，但他們表示婚期暫無影響，反而身邊不少朋友要延期行禮，惟有寄望疫情快點完結，港人身體健康。

鄭俊弘、何雁詩及譚俊彥等前晚在將軍澳電視城錄影，近日天氣寒冷，不過何雁詩仍然以大露背性感舞衣上陣，問鄭俊弘對未婚妻的打扮有何感覺？他搞笑說：「無所謂，佢開心就得，只係驚佢冷親！」他坦言新冠肺炎疫情影響部分工作，不過他參演的新劇《陀槍師姐V》會如期在月中開工︰「今次第一次演大反派，要好惡好霸氣，開頭都擔心唔似，不過試咗造型，有大紋身配合都ok。」

譚俊彥多得狄龍畀口罩

至於何雁詩本要錄新歌，亦因疫情而押後，問到二人的婚禮可有影響？她說：「我哋今年年尾先行禮，所以暫時都無影響。不過身邊有朋友婚禮要延期，希望疫情可以快啲過，大家身體健康。」

同場的譚俊彥表示早前一家四口去日本旅行，回港後亦自我隔離14日︰「小朋友唔使返學，我就做老師教下佢哋寫字，又同佢哋玩下跳舞機當做運動。不過太太喺日本買錯咗好多防花粉嘅口罩，結果得個桔！」但他表示全靠爸爸狄龍，家中才有足夠的口罩存貨：「爸爸平時好鍾意戴口罩，佢又拎啲畀我，所以屋企仲有幾盒存貨。」

譚俊彥坦言受疫情影響，他與朋友合資的食肆生意大跌：「餐廳喺馬頭圍道，附近有確診個案，我同拍檔話六合彩又唔見我哋中！」他表示正考慮轉型，改為賣凍肉及外賣形式經營。

撰文︰Pauline

編輯：李潔盈

美術：梁政敏