唔夠分入訓練班 古巨基全靠張之珏救星途

製作人張之珏前晚在北角新光大劇場舉行慈善音樂會，慶祝70歲大壽兼入行50周年。一眾徒弟及圈中好友現身支持，包括古巨基（基仔）、何家勁、袁文傑等，張之珏大爆基仔本來無緣入行，幸得他將基仔放入後補名單，才得以在娛圈發展。

張之珏前晚舉行「A Life Moment with張之珏&Friends群星慈善音樂夜」，活動收益將撥捐護苗基金及幫助戲劇藝術發展。古巨基在演唱會上打頭陣演出，一出場即向張之珏送祝福：「祝願張Sir身體健康，食得玩得瞓得！」隨即唱出《初心》、《愛與誠》及《當年情》。

何家勁唱歌撑恩師

基仔在台上表示與張之珏在無綫藝員訓練班相識，張之珏即從後台步出，大爆基仔當年面試數次，都不夠分入圍訓練班，張之珏說：「基仔雖然無咩樣貌，但我鍾意佢嘅聲綫，所以放佢入waiting list，後來覆試有人缺席，所以基仔先順利入到訓練班。」他指基仔在訓練班畢業時，雖然怕醜又沒甚表現，但勝在乖巧，所以介紹對方做《娛樂新聞眼》。

張之珏徒弟何家勁前晚有份表演，他表示與張之珏結緣在麗的時代，直至麗的改名亞洲電視後，張之珏更提拔他拍劇及唱主題曲。何家勁笑言早年曾與張之珏失聯，幸好得一位亞視編劇牽綫才重新聯繫。他目前主要在內地打理健康食品生意，新年亦無假放要繼續工作。

另一嘉賓袁文傑，自言在90年代初加入無綫訓練班時，便是張之珏擔任訓練學院院長。袁文傑笑說：「張Sir又cool又有威嚴，見親佢都好驚。之前我演『游生』，都係參考張Sir嗰種講嘢唔望人、好有霸氣嘅感覺。」

撰文︰Pauline

編輯：李潔盈

美術：梁政敏