自認高危一族買定保險 古天樂曾割大腸瘜肉

古天樂（古仔）昨日出席保險公司活動，他表示平時拍戲偶有意外發生，試過被劍刺傷眼球要縫針、十字韌帶受傷等，所以深明買保險的重要性，並會一年接受兩次身體檢查。

古天樂拍動作片搞到周身傷，問到保險費用會否很貴？他表示︰「我係屬高危級別，但講到麻煩，應該係幫父母買保險，因為佢哋年紀大，即使有全面醫療保障，但到某啲年紀係會做唔到手術。」

對於身家億億聲的古仔而言，他認為健康才是最重要，並自爆每年盡量都會做兩次身體檢查︰「健康用錢係買唔到，我個生活唔係平常人，工作時間唔定，食嘢又唔定，又周圍飛嚟飛去。（檢查報告點講？）好好，一切正常，我隔兩年又會去照胃鏡、腸鏡，都試過喺腸照到有瘜肉，之後做手術切除，可能食嘢有問題。（係咪食得杯麵多？）係食嘢問題啦！」傳媒追問他早前被網民發現於經濟艙食杯麵一事，古仔避談艙位級別，只笑謂︰「我食杯麵啫！我答完啦。」

被斟拍《倚天屠龍記》

古仔擔任香港演藝人協會會長，有指影視圈步入寒冬期，投資者都不願注資開戲，古仔坦言不單電影圈，其實各行各業都處於寒冬期，「投資者要睇回報、風險，睇社會狀況，就算我哋肯投資，無人有意慾去睇戲，氣氛都唔會好。如果有政府幫手就可以減低投資成本，呢個係新計劃，要同政府協商之餘，都要同業界坐低傾。」他希望捱過冰河時期，再次興旺就會做得更好。

此外，王晶在微博宣布開拍2020年版《倚天屠龍記》，打算搵古仔與林峯飾演張翠山、張無忌兩父子，古仔直認其事，但未有透露詳情。

採訪︰Pauline

編輯：陳禮恒

美術：梁政敏