下月參與音樂會念亡友 薛家燕︰發夢同黎小田唱歌

資深音樂人黎小田（Michael）本月初病逝，享年73歲，為表揚他對樂壇的貢獻，音樂界一班歌手將於明年初舉行音樂會向黎小田致敬。身為小田好友的薛家燕，亦第一時間度期參與。

薛家燕昨日出席記者會，宣布《To小田:With Love Forever音樂會》將於下月10日假旺角麥花臣場館舉行。家燕姐說︰「Michael喺音樂界貢獻好大，佢作咗700幾首曲，栽培咗好多新人，依家個個都成為樂壇巨星，我知道有呢個音樂會，即刻叫個女度期。」大會扣除相關開支後，將全數撥捐慈善用途。

除了家燕姐，一班歌手包括黎瑞恩、泳兒、杜德偉、麥潔文、徐小明及陳欣健等亦落實演出，家燕姐表示︰「好多嘉賓仲度緊期，好似梁漢文、蘇永康、草蜢同成龍，成龍大哥依家喺內地，佢同Michael好熟，好有心。」屆時獻唱哪首歌？她說︰「《心肝寶貝》係必唱，上次錄影節目唱到一半唱唔到，希望今次可以唱晒成首。另外，如果搵到我當年同Michael合作嘅搞笑版《胭脂扣》短片畀觀眾重溫，我會唱埋《胭脂扣》。」

前妻關菊英缺席

家燕姐表示小田的獨生子Chris與新抱林寄韻屆時會現身捧場，至於小田前妻關菊英，則因不在港而未能出席。另外，家燕姐又重提在Michael的喪禮上看到一隻蝴蝶，她認為是Michael的「化身」︰「蝴蝶係黑白色，個身好似鋼琴keyboard，Michael又鍾意着黑白衫，佢一直伏喺張凳度，個位睇到晒成個大堂，伏到第二日儀式開始，就飛咗去Michael遺照下面，我哋走去同佢影相。（發夢見到小田？）有呀，夢中我哋喺到唱歌同做趣劇，笑到唔停口，見到佢個樣都開心嘅。Michael在天之靈都會感覺到佢嘅貢獻無白費，大家都好懷念佢。」

編輯︰李潔盈

美術︰梁政敏

撰文、攝影︰倪小珊