勁減9磅 鄧小巧︰朋友讚我瘦咗又靚咗

早前完成個人音樂會的鄧小巧，前晚在佐敦舉行粉絲見面會，兼宣傳新推出的EP。最近減肥成功的小巧，減去近九磅體重，外形更愈來愈有女人味。不過她自嘲一身造型太有江湖味，所以要更加女性化一點。

鄧小巧前晚一身黑色皮褸打扮出席見面會，電了一頭曲髮的她更見女人味。臨近聖誕，她特地在見面會上向粉絲派糖及香檳，相當有心思。提到身形纖瘦不少，她笑言希望能保持運動習慣，可讓她穿靚衫時不用縮肚。更有女人味？她笑說︰「咁我都係女仔嚟嘅，只係之前打扮中性啲。頭先化完粧照鏡，覺得自己好似黑社會阿太咁，好有江湖味，所以即刻加番啲胭脂！不過我都步入中女階段，出街要帶暖水壺。」

不覺有追求者

小巧笑言自從減肥成功後，朋友都讚她瘦了又漂亮了︰「不過我唔覺得多咗追求者，可能自己做嘢太忙，連朋友都少咗見。」聖誕節將至，她表示已相約朋友在佳節狂歡，問到多個樂壇頒獎禮取消，歌手朋友更易約？她說︰「我反而覺得無咗頒獎禮，少咗機會見到歌手同幕後朋友，因為以往最齊人就係頒獎禮。」她又謂稍後希望休息一月，屆時會禪修，聆聽一下自己的心聲。

撰文︰Pauline

編輯︰李潔盈

美術︰顏玉玲

攝影︰林良明