否認簽古天樂公司 鍾嘉欣享受自由身

鍾嘉欣昨日現身澳門，出席聖誕裝飾亮燈儀式，早前有傳她將簽約古天樂旗下公司天高娛樂，但她昨日否認傳聞，又說：「簽公司就隨緣，若果緣份到就擋都擋唔住！」

鍾嘉欣昨日一身銀色華麗打扮現身，早前有傳她有意加盟天高娛樂做佘詩曼師妹，全力進軍電影界。不過雙方洽談期間，鍾嘉欣發現自己的名字已出現在天高娛樂的官網，令她不滿，最後沒有成事。她昨日回應說：「我唔知官網呢件事，我同嗰間公司某幾位成員係好朋友，佢哋曾經幫我推薦同轉介工作，關係只係咁。」她表示現在是兩個小孩的媽媽，亦十分享受自由身，但她坦言仍有戲癮，也自覺在演藝事業上可以走得更遠。

爆細仔勁Man

提到聖誕節，鍾嘉欣自言非常重視這節日，提到一對仔女，她笑指現時一歲多的細仔Jared已學識叫「爸爸、媽媽」，她說：「但係阿仔唔肯錫錫，邊個錫埋去都會擰轉面。好man！」她又大讚三歲大女Kelly是個好家姐，經常幫忙照顧弟弟，令她深感安慰。

撰文︰Steven

編輯︰李潔盈

美術︰梁政敏