肚凸凸疑懷孕？ 歐陽巧瑩︰係20磅肥膏

歐陽巧瑩去年與林師傑結婚，成為幸福人妻，明年與無綫約滿的她，已決定淡出幕前。昨日她出席無綫明珠台活動時，明顯肚凸凸疑似有喜，但她卻笑言只是暴肥，實屬美麗誤會。

歐陽巧瑩、應屆港姐黃嘉雯、王菲及古佩玲等，昨日出席明珠台台慶節目活動。只見歐陽巧瑩明顯暴脹不少，問到是否要恭喜她（有喜）？她即笑說︰「真係未有，我係純粹肥㗎咋，呢20磅係肥膏，係幸福脂肪，真係未有喜。」不過結婚一年的她確實有計劃生B，更獲林盛斌（阿Bob）傳授生仔秘方，但她笑指老公林師傑想生女。

現年26歲的歐陽巧瑩，揚言想「生得幾多得幾多」，希望可以生B生到30歲，因此她明年約滿無綫後，決定不再續約，專心做家庭主婦。她說：「《金宵大廈》係我最後一套劇，我肥咗20磅，都無諗住減肥，做幕前好大壓力，要keep fit隨時準備投入工作，依家唔需要。」她坦言不想在有壓力的情況下懷孕，老公也支持她退出幕前：「我依家忙緊做林師傑嘅秘書，經營佢一個已經好忙，我有幫佢剪片、執片㗎。」

黃嘉雯願隨男友定居瑞士

此外，三位應屆港姐昨日透露，將會在台慶當晚演出，她們又不約而同說希望有機會拍劇。冠軍黃嘉雯說：「除咗拍劇，我鍾意旅行，都想主持旅遊節目，例如《嫁到這世界邊端》系列。」問她日後若跟瑞士籍男友結婚，會否「嫁雞隨雞」移居當地？她說：「唔介意，我之前都同佢返鄉下見家長，雖然有啲悶，但都接受到。」

採訪︰Pauline

攝影︰林良明

編輯︰李潔盈

美術︰梁政敏