想送囝囝出國留學 陳慧琳要做跟得媽媽

陳慧琳（Kelly）昨日出席保險公司活動，提到兩個兒子劉昇（蝦餃仔）及劉琛（小龍包）日漸長大，Kelly亦有計劃將來安排囝囝出國留學，但她自言不放心，可能屆時做跟得媽咪，實行「陪太子讀書」。

陳慧琳早前為保險公司拍攝子女儲蓄保險計劃廣告，飾演訓練兒子獨立的媽媽。昨日廣告在活動上首播，Kelly睇到眼濕濕，她事後受訪坦言，為人父母都希望讓兒子學識獨立︰「我仲學緊，但我會好擔心同埋心軟，爹哋反而強硬啲。」

Kelly笑言兩個囝囝各有性格，又透露有計劃送他們去外地讀書。提到大會指每個子女到海外升學的費用高達200萬元，Kelly大表驚訝，問她打算何時送囝囝去留學？她表示等多幾年︰「我自己當年都係15歲去紐約讀書，仲要自己一個搭飛機，嚇到個心跌咗出嚟呀。大仔依家十歲，仲有幾年，時間好快過，好似仲有好多嘢未教佢咁。」

出錢助下一代置業

問Kelly屆時會否陪囝囝去外國開學？她笑說︰「把口當然係叫佢自己去，但點都會跟埋去先，同老師打聲招呼。」另外，提到幫兒子儲蓄，她表示將來囝囝置業，自己必定幫手︰「不過結唔結到婚佢自己問題啦，唔知佢識唔識到女仔。」她笑言一直有八卦兒子的感情，知道囝囝沒有女朋友，目前也沒有玩社交網絡。她笑說︰「如果阿仔玩社交網，一陣佢影晒屋企出嚟，咁我要日日夜夜化粧先得，唔係影到我去完廁所出嚟抽褲就肉酸。」

採訪︰Pauline

編輯︰李潔盈

美術︰梁政敏