齊來Baby Shark Dance 城城爆大女愛洗腦兒歌

郭富城自從榮升爸爸後，每次出席活動都離不開談女兒經。昨日他在尖沙咀海港城，帶領半百名小朋友大跳兒歌《Baby Shark》城城版舞蹈，他更自爆跟大女Chantelle在家中合跳洗腦神曲，非常好玩。

城城提起家中兩名寶貝女Chantelle和Charlotte，一臉冧樣，並透露大女Chantelle看到爸爸的《Baby Shark》MV時，反應十分搞笑，城城說︰「佢睇片睇到呆咗，跟住走埋嚟攬住錫爹哋，佢好開心。」城城更大爆Chantelle每次扭計，都要求看洗腦神曲，「佢自己打開iPad撳入去睇，我會陪佢睇，呢首的確係神曲，真係好可愛，我仲同佢一齊跳，亦都有拍片。（公開父女跳舞片？）可以考慮下，我都樂意分享，但要等佢大個啲先。（囡囡有跳舞潛質？）絕對有，佢有上音樂堂。」

囡囡低調出席活動

近期城城的小朋友粉絲急增，他開心表示︰「喺唔同階段，我啲粉絲好多都有自己嘅小朋友，我好樂意去做呢件事，覺得好榮幸。」有女萬事足的他，十分享受湊女生活，並自爆早前同老婆一齊送女兒第一天上學，「好開心送佢返學，陪佢入校園好感動，佢要開始學習群體生活，接觸多啲外面世界。講個秘密你哋聽，佢今日（昨日）都有嚟，特登睇爸爸工作，睇我喺現場跳畀大家睇。」對於被形容為「女兒控」，城城欣然接受，還笑說︰「係應該嘅！」

此外，城城日前與太太方媛夜遊維園，他揚言不用工作時，都會盡量抽空陪伴家人，也樂意在街上與遊客及市民打招呼和合照。城城表示︰「同大家喺街碰面都係緣份，至於行公園係一件好浪漫嘅事，我太太懷孕時，我哋都經常行公園，因為環境同空氣好好。」

採訪︰倪小珊

編輯︰陳禮恒

美術︰梁政敏