46歲牛一 蔡少芬收張晉玫瑰花冧爆

正懷有第三胎的蔡少芬（Ada）前日46歲生日，老公張晉、好友朱茵、鄧麗欣、原子鏸及歐倩怡齊齊為她慶祝，張晉更送上46支玫瑰花，令Ada冧爆回贈香吻。

張晉當日除了送上玫瑰花外，又準備粉紅蛋糕及親手撰寫生日卡，逗得蔡少芬笑不攏嘴，羨煞旁人。Ada笑言︰「佢記得我生日，仲準備咁大束花，已經好開心！」問到張晉可有送禮物給她？Ada說︰「對上一次收禮物已經係聖誕節，當時佢送咗個手袋畀我，其實好感恩，我哋都無乜物質缺乏，買禮物都係為咗對方開心，佢仲話我今年都無送生日禮物畀佢。」

提到生日願望，Ada表示最緊要平安生個健康BB，問到正日當晚如何慶祝？她說︰「嗰晚有朋友送咗間酒店房畀我哋，所以我撇低兩個女，好好去享受，囡囡已經同我講咗生日快樂，仲叫我玩得開心啲。」

生完3個即封肚

此外，席上好姊妹朱茵打趣叫Ada再生多個，成為「多產」藝人，Ada聞言即說︰「啋過你！呢啲『多產』我唔要，工作嗰啲『多產』我就要。我同朱茵大家咁話，叫佢追多個先，我就夠喇，無手再抱，我老公要留番一隻手攬我，所以我決定『封肚』，生埋呢個夠晒數。」

撰文︰Pauline

編輯︰李潔盈

美術︰梁政敏