與張家輝鬥曬黑 古天樂︰我唔曬燈就番佢

古天樂（古仔）、吳鎮宇及張家輝前晚出席主演的新片《使徒行者2諜影行動》首映禮，三人訪問時大放笑彈，提到古仔出名膚色夠黑，家輝前晚笑言拍電影外景時曬黑不少，企圖跟古仔比拼一下，可惜依然較古仔白淨兩度，場面惹笑。

古天樂、吳鎮宇及張家輝前晚在首映禮上雞啄唔斷，提到戲中連場動作戲，他們大讚動作導演錢嘉樂安排妥當，所以不覺辛苦，但古仔拍攝時不慎受傷︰「嗰場爆炸戲我要跌落地，當時我右手撳咗落啲玻璃碎度，不停流血，割得好深，結果去醫院縫咗三針。」吳鎮宇聞言笑說︰「三針就唔好講啦，我拍文戲，鋸扒都鋸到手指尾，都縫咗兩針。我本來喺元朗拍，但我都要出番瑪嘉烈（醫院），我梗係唔放心喺元朗啦。」

至於家輝則笑言沒有受傷縫針，但拍攝時曬黑不少，他笑說︰「我要追住古仔，但曬極都黑唔到，我喺西班牙起勢咁曬，但都仲係低咗兩度（膚色）。」古仔搞笑說︰「我怕打燈（工作人員）辛苦，我就唔曬燈就番家輝，仲係咁敷面膜。」另外，提到將在10月開個唱的謝安琪表示，身邊朋友揚言只買有古仔做嘉賓的場次，古仔只說︰「我未知（做嘉賓），嗰日好似有特別嘢做。」田蕊妮開騷也想邀古仔？他說︰「我真係唔知！」鎮宇聞言抵死說︰「我套音樂劇都差個人，古仔客串一、兩場啦！」

袁偉豪想去西班牙度蜜月

同場的袁偉豪與張寶兒拍拖出席首映，首次拍電影的寶兒有份去西班牙拍外景，袁偉豪則充當「跟得男友」陪伴︰「拍完之後，我哋留咗一星期喺當地玩。（順道視察結婚場地？）結婚未必會揀西班牙，蜜月就OK，因為天氣好乾爽，好寫意。」

撰文︰Pauline

編輯︰李潔盈

美術︰梁政敏