華仔起哄獻聲 古天樂︰開心幾時唱都得

由劉德華擔任監製及主演的新片《掃毒2天地對決》前晚舉行首映禮，電影在內地上映至今，票房已衝破十億人民幣，更有指可能開拍第三集。今集主題曲由華仔與古天樂（古仔）合唱，苗僑偉（三哥）笑言下集希望唱埋一份。

劉德華、古天樂、苗僑偉、陳家樂及衛詩雅等，前晚出席《掃毒2天地對決》慈善首映禮。三位男主角齊齊受訪，對於電影在內地票房成績好，華仔笑言對票房隨遇而安，問到分紅是否十分理想？他笑說︰「唔好講呢啲。」有傳《掃毒》開拍第三集，會否原班人馬演出？華仔表示未知續集是否成事︰「睇下三哥收幾多（酬勞）先。」三哥聞言說︰「續集要問番電影老闆，我唔收錢都拍。」

今集的電影主題曲由華仔及古仔合唱，三哥自嘲唱得不及古仔，所以無份獻聲。三哥搞笑說︰「原本我唱國語版，但因為古仔唱得太好，所以唔使我唱。」提到三嫂戚美珍讚三哥聲底靚，他笑說：「華仔同我登台就會知，我唱完第一句，佢唱唔到落去，因為我一唱就唱最尾嗰句，歌詞亂晒籠。」

否認娶宣萱

若電影開拍第三集，問三哥會否與華仔及古仔組band唱主題曲？三哥笑言可以考慮。問到平日不願唱歌的古仔，唱主題曲有否唱上癮？古仔說：「無話上唔上癮，但我好怕聽自己唱歌，華仔叫我聽playback，我都話唔聽，我未接受到自己把聲。」華仔聞言笑說：「古仔唔想聽自己把聲，但大家都想聽！」提議古仔在電影慶功宴時再唱？古仔說：「其實開心幾時唱都得。」另外，網上突然傳出古仔會在今年年底迎娶宣萱，古仔只說：「唔係事實唔回應。」

採訪︰Pauline

編輯︰李潔盈

美術︰梁政敏