盧海鵬拍劇 鬧爆游學修

盧海鵬、游學修及盧巧音昨日到荃灣宣傳ViuTV新劇《仇老爺爺》，鵬哥在劇中與游學修合演兩爺孫，他笑指入行數十年，擔正男主角十分有壓力，還自爆入劇組第一天已想「罷拍」。鵬哥表示︰「起初唔習慣，唔知佢哋拍乜，試過瞓醒幾覺都未拍得，就拍枱話唔拍喇。20集拍到幾時呀？都唔知我條命有無咁長畀佢拍！」

幸好身兼導演的游學修即時roll機，又叫副導演呵番鵬哥，才令鵬哥「下火」。游學修解釋︰「可能嗰日啱啱食完飯，鵬哥飯氣攻心，又咁啱日景轉夜景，鵬哥瞓咗一陣以為瞓咗好耐。」至於飾演游學修母親的盧巧音表示，拍完《仇老爺爺》有很深感受，會珍惜與家人的相處時間。