江華申冤 無委屈老婆麥潔文

久未在幕前公開獻唱的江華和麥潔文（Kitman）昨天出席《明愛暖萬心》記者會，兩人將於節目中同台演出。江華自爆結婚害了Kitman，這些年來他被指不准老婆唱歌，受盡委屈。

《明愛暖萬心》將於本周六舉行，有份參與演出的歌手藝員還有關楚耀、JW王灝兒、洪卓立等，芸芸嘉賓當中，江華和麥潔文資歷最深，兩人笑言︰「入到後台無一個識！」Kitman解釋她將分別和老公、女兒合唱，由於是首次與女兒同台演出，目前已開始練習。

江華一直keep住fit爆身形，他笑言︰「其實係保持運動量，平時要keep嘅，唔係等做嘢先keep，話節食就呃人，節制好緊要，我老婆一見到甜品就發癲，控制唔到。」Kitman透露十月中在旺角麥花臣場館開演唱會，場數暫時未定。江華突然對老婆說︰「好難得你出嚟唱，啲人成日話我管住老婆，話結婚即係害咗佢，咁多年嚟我受咗好多委屈。」

麥明詩只借錢畀單身男

同場的麥明詩最近在節目《＃後生仔傾吓偈》中自爆曾借一百萬給朋友解困，她說︰「係一個圈外男性朋友，識咗六、七年，我個人都易信人，相信佢就算破產都會用一生嘅努力還畀我，不過佢半年內已經還晒。」問到可有收取利息？她笑說︰「我無要求，但佢還多咗幾個%畀我。」她笑指將來仍會借錢給朋友，可多收利息，不過會建立審批制度︰「要係單身、男人、唔還錢就要以身相許。」讀法律的麥明詩指，今次借錢也有找律師朋友草擬借據，若對方不還，可以申請對方破產，以保障自己。

採訪︰Pauline

攝影︰林良明

編輯：黃卉彤

美術：招潤洪