收視高開曬肌找數？ 馬明︰要露梗係搵女藝人

新劇《白色強人》播映一星期，首集平均收視達28.7點，成績相當理想。一眾主角馬國明、郭晉安（安仔）及李佳芯（Ali）等昨日宣傳新劇，提到若收視高企，會否露肉回饋觀眾？馬明笑言要女藝人幫手，而Ali則揚言想睇馬明肌肉。

《白色強人》一眾演員昨日到葵涌香港癌症基金會服務中心，出席宣傳活動，提到劇集首集收視不俗，馬國明說︰「估唔到咁犀利，因為好少香港電視劇講醫療改革，唔係一般師奶劇，以後TVB可以拍多啲唔同題材。」

提到他的醫生角色，獲觀眾大讚有型，他笑說︰「好多朋友都話未見過我咁有型！（力爭視帝？）呢樣我無諗，最緊要大家鍾意個劇同收視好就夠。」若收視好會否承諾曬肌找數？他搞笑說︰「要露嘅話搵女藝人，我睇安仔（郭晉安）頭，要還大家一齊還！」

同場的郭晉安力撑馬明奪今年視帝，安仔說︰「我貼咁多年都未衰過，馬明個角色好真性情，好啱佢做，不過唔好畀壓力佢。」安仔表示若《白色強人》收視達33點，他會與馬明合唱一曲《沉默是金》回饋觀眾。

李佳芯送「奶露」

至於女主角李佳芯，揚言收視好會出動「奶露」，令人想入非非。但Ali解釋說︰「我係話萬歲芒果西米露、椰汁奶露，女藝員畀甜頭大家，請食甜品最好。男藝員就梗係露『朱古力』啦，馬明平時天然呆，我想睇佢嗰排『朱古力肌』。」提議Ali穿泳裝，她自認孤寒，連男朋友也未見過她的水着look︰「因為我身材無突破，大家睇番我演技啦。」

採訪︰Pauline

編輯︰李潔盈

美術︰招潤洪