為命仔不能再做運動 余德丞爆喊：人生冇咩意義

去年在球場踢波時休克昏迷兩日的無綫小生余德丞（Dickson），在前晚播出的真人騷節目《如果這樣生活》中，重提死過翻生的經歷。運動員出身的Dickson，談到因心臟問題無得再做運動時，即場爆喊，不少視迷直言感動到淚崩；有女粉絲就贊同男神珍惜生命！

前晚播出的第六集《如果這樣生活》由Dickson做主持，他到訪日本享受慢活生活，又學打棒球、釣魚及玩音樂。去年八月，Dickson踢波期間忽然身體不適，在場外休息時卻不支暈倒，最終昏迷兩日才甦醒，與死神擦身而過。他在節目中直言經此一役，對生命的睇法有所改變︰「我今年29歲，應該係正值人生嘅黃金時間，亦係事業嘅拼搏期，但我經歷過死亡十分鐘，令我明白到人生係變幻無常、變幻莫測！」他又稱︰「好多人以為我醒唔番㗎，甚至醫生都叫我屋企人有心理準備，唔經歷過唔會明白身體健康幾緊要！」

要對家人負責任

曾是香港游泳代表的Dickson指，經醫生診斷他是心律不正，當提到或者不能再做劇烈運動時，他更哭成淚人︰「當發生呢件事之後，醫生同我講有機會以後唔可以做運動，心裏面係非常非常之難受，因為由小學開始我已經好鍾意做運動，所以我仲想喺球場上搏命，如果真係無得踢，好似人生無乜意義咁樣！」

然而，當Dickson回想選擇生命還是運動，在沒辦法下都要選擇生命，他稱︰「因為要對自己負責任、對屋企人負責任，所以一定要接受呢件事。」節目播畢後在網上惹來熱烈討論，大量視迷在這位男神的IG留言打氣；有人亦指他感觸落淚，睇到心痛。

撰文︰Steven

協力︰Jennie、Ranee

編輯︰黃寶恩

美術︰梁政敏