衝出香港 簽約美國公司 李施嬅做Marvel隊長師妹

《復仇者聯盟4》掀起全球熱潮，票房屢破紀錄，香港亦已收逾二億票房，戲中有份參與的演員自然備受關注。而早前離開無綫勇闖荷里活的李施嬅，昨日興奮公布已簽約美國一間經理人公司，成為「Marvel隊長」貝兒娜森的師妹，之後她更主力在美國發展。

李施嬅昨早到香港科學園參加三公里慈善跑，李施嬅表示前晚相約好姊妹陳茵媺（Aimee）一齊飲酒兼睇騷，她笑謂︰「以前都會同Aimee去飲下酒，但佢依家專注湊仔，我知今日要跑步，都畀晒佢飲，Moses（陳豪）有嚟車我哋，好sweet。」施嬅表示平時有做運動習慣，但本身血壓低，易頭暈，所以昨日搵了堂妹陪她一齊跑。

早前離開無綫向外發展的施嬅，又興奮宣布終於簽下美國的經理人公司Authentic，做「Marvel隊長」貝兒娜森的師妹，對此施嬅表示︰「好開心！但只係簽咗美國，亞洲部分都係我自己去傾，依家陸續都有傾緊工作，所以之前《法證先鋒IV》話要重拍，都有啲複雜。（之後集中喺美國發展？）今年會，電視劇同電影都會拍，自己都好興奮，可能有機會去荷里活發展。」

已知杏兒第二胎性別

另外，前晚施嬅和「胡說八道會」好姊妹胡蓓蔚、胡定欣及黃智雯，為懷了第二胎的胡杏兒舉行驚喜的Baby Shower，一班準契媽更為杏兒拍片，不過杏兒扑爛蛋糕後，片段便結束，對於腹中胎兒是仔是女，她仍然繼續賣關子，施嬅則笑謂︰「我哋知，佢suppose噚日講。（係仔定女？）唔好意思，雖然好想講，但我唔公布得，或者佢今日會公布，不過佢應該會繼續生！佢哋李家好注重小朋友，起碼生三個。（即係再追個女？）之後會有好多女、好多仔，相信佢呢幾年都好忙。」

杏兒兩年前為老公李乘德（Philip）誕下囝囝Brendan，今年初宣布懷有第二胎，預產期是七月，而對於好姊妹悉心安排的Baby Shower，杏兒昨天留言感謝BB的一眾契媽們，給她帶來驚喜，眾人打邊爐又唱卡拉OK，玩得相當高興；惟另一位契媽姚子羚則因病缺席。

撰文︰Pauline

編輯：黃寶恩

美術：梁政敏