首次孖老公現身 鍾嘉欣暫時封肚唔再生

婚後定居加拿大的鍾嘉欣，近日回港探望好姊妹，兼出席商業活動賺外快。原來嘉欣今次除了帶一對仔女回港，老公Jeremy Leung亦有同行，前晚Jeremy更化身「跟得老公」，首度陪嘉欣公開現身，夫妻大曬恩愛。

鍾嘉欣前晚偕老公到尖沙咀出席頒獎禮，穿上旗袍的嘉欣，展現fit爆身材。二人手拖手恩愛到場，拍照時Jeremy攬實嘉欣纖腰，又不時摸嘉欣屁股，夫妻更旁若無人地深情對望，發放閃光彈。

嘉欣接受訪問時，笑言自從04年參選華姐時穿旗袍後，相隔15年才有機會再穿旗袍︰「我都唔知自己能唔能夠carry，不過旗袍係老公幫我揀，覺得好有貴氣，我就幫佢揀番同花紋嘅西裝。今次第一次同老公嚟晚宴，因為我需要一個男伴，佢就嚟陪我。」

留港慶祝母親節

嘉欣表示會留港度過母親節，一家人食飯慶祝，她笑言最開心收到大女繪畫的卡。她說︰「阿女日日都會畫卡畀我，囝囝就第一年陪我過母親節，佢應該會送個濕吻畀我！囝囝依家學爬，好可愛，佢又鍾意咬拖鞋，睇少陣都唔得。」問她可會再生第三胎？她說︰「暫時唔會啦，我想好好照顧一對仔女，喺地球生活唔容易，好多挑戰，我同老公會教到佢哋有『武器』傍身。親自教好困身，都無時間再教多一個。」

撰文︰Pauline

編輯︰李潔盈

美術︰梁政敏