《新紮師妹》拍檔重聚 千嬅召喚吳彥祖返港拍戲

楊千嬅前晚在將軍澳電視城，錄影汪明荃主持的遊戲節目《娛樂大家》。千嬅日前在金像獎頒獎禮重遇《新紮師妹》情侶檔吳彥祖，她希望對方快點回港拍戲。

楊千嬅前晚為《娛樂大家》任嘉賓，她自言已兩年沒上遊戲節目︰「我媽咪有睇呢個節目，話啲遊戲幾好玩。不過我自己玩遊戲唔太叻，但係識睇人眉頭眼額，一唔對路就走人！」她表示節目播放時較晚，所以囝囝應未能捧場。她說︰「我同咗老公（丁子高）講，因為佢係『遊王』，好鍾意玩game，仲好叻，類似《獎門人》嗰類估字遊戲，佢都未輸過，喺朋友圈中出晒名。」她表示夫婦平日也有跟囝囝玩益智遊戲︰「大人玩嗰啲就唔方便同佢分享。」

另外，提到千嬅與《新紮師妹》舊情人吳彥祖在金像獎頒獎禮上重逢，她表示事前不知對方會出席，所以十分驚喜。她說︰「大家都好掛住吳彥祖，我好想佢返嚟香港拍戲，佢喺港產片有個位置。」會否再與吳彥祖合作？千嬅說︰「要有劇本同投資者，我本來諗住去美國開演唱會嗰陣，去探下佢，因為我未見過佢個女，前兩日先同佢聯絡過，點知跟住就喺香港見。大家都好開心，因為識於微時。」

張振朗臭腳按摩王浩信

同場的張振朗正趕拍新劇，他自爆之前與王浩信拍攝一場按摩戲，他乘機整蠱對方︰「本來我要用手同浩信按背脊，後來我改咗用腳趾幫佢按太陽穴！」他自爆拍攝前沒有洗腳︰「我見浩信反應好開心，表情好enjoy，但唔知佢下次會唔會報仇。」

撰文︰Pauline

編輯︰李潔盈

美術︰梁政敏

攝影︰林良明