對住父母唱《愛得太遲》 古巨基淚灑舞台

古巨基（基仔）舉行一連四場的《WE我們世界巡迴演唱會香港站Part 2》，前晚已是第三場，基仔父母亦是座上客，當基仔唱出《愛得太遲》時，眼淺的他激動落淚，並寄語大家抽多些時間陪伴家人。

基仔是圈中孝順仔，前晚他的父母在台下欣賞其個唱，基仔不忘向他們道出心聲。他直言因工作未能經常跟雙親食飯，但不時以電話聯絡，並自爆媽媽稱呼他「巨基」，又關心他在工作上是否開心和順利，而爸爸就關心他工作忙不忙，但只要聽到基仔的聲音，就會安心去睡覺。說到此處，基仔哽咽起來，更突然淚灑舞台，見者心酸。

前晚嘉賓有方力申（小方）、側田、6號（繆浩昌）、小肥（徐智勇）及INK，身穿黑白色禮服的五人與基仔合唱《年年有今日》。小方又大爆側田在後台憶起第一份工作做和音時，竟然感觸起來。基仔表示很高興12年後幾位好兄弟終於聚首一堂，眾人擺Pose拍照留念，他笑言希望廿年後合體再影老年版。

完騷後基仔在後台受訪，他坦言每場騷體力消耗好大，第一套水晶衫重達80kg，鑲有兩萬粒水晶石，着上身就似陷入泥濘一樣沉落去，但為了效果靚，他願意辛苦些，又笑言第二晚完騷後立刻請醫師上門按摩︰「唔係整親，係條腰舊患隱隱痛，以防萬一就叫醫師嚟重整番啲骨。（唔係叫老婆按摩？）佢唔識按摩，平時係我同佢按摩㗎。」

提到講起父母便忍不住落淚，基仔表示每場唱完《愛得太遲》都講相同說話，目的是希望大家多打電話問候父母。父母每晚都捧場？他說︰「係，我有演唱會演出，都會嚟睇，如果係電視節目就問幾時播。」

克勤教生B兩招

基仔第二場請來李克勤做嘉賓，兩人在台上大放笑彈。克勤關心結婚五年的基仔仍未生B，便傳授生育心得──要有舉同埋動，又教基仔用倒掛金鈎及腳趾尾拉西兩招，基仔笑說︰「佢叫我意會呢兩招。我問克勤倒掛金鈎係邊個做倒、邊個做掛，佢都答唔出；跟住佢講腳趾尾拉西，但邊個西佢又無講清楚。都係做完騷再請教佢，呢啲係要唞一唞，唔好咁忙先得。」

撰文︰Pauline

編輯：黃寶恩

美術：梁政敏