玩謝速遞員！訂奶粉留上水化妝專櫃地址 內地婦：成日幫襯會幫我收貨嘅

沒有最誇張，只有更誇張！一名內地婦人在香港訂奶粉時，竟將某化妝品牌位於上水某商場的專櫃作為收貨地址，令專櫃職員及速遞員大感無奈。事後，速遞員於網上分享此事，坦言當時內心「簡直講咗N句粗口」。

用盡方法聯絡買家

速遞員日前在Facebook專頁「生仔要考牌系列」投稿，指上周日（17日）收到一張奶粉的送貨單，收貨地址為上水某商場一個化妝品牌的專櫃，上面只留下一個內地電話，「首先我嘗試去該專櫃問下有冇哩個人，鋪頭經理話冇哩一位人士，亦都唔係佢哋同事。最後就經我九牛二虎之力，用盡所有方法去搵晒任何聊天軟件（WhatsApp, Line, WeChat）去聯絡，最終喺WeChat搵到嗰位客人。」

內地婦要求下星期先拎貨

他指出，原來該名客人是一名內地女子，沒有香港地址及電話，但經常來港到該化妝品專櫃購物，遂寫上該地址作為收貨地址：

（微信語音對話，譚仔阿姐式廣東話）

🕵🏻：「小姐你好呀！我係xxx公司送貨㗎！想問番你呢，我去過送貨地點上水資X堂，佢哋表示冇哩一個人呀！而你嘅聯絡電話係內地電話，我哋聯絡唔到你㗎！」
🙍：「哦，我唔喺香港住，冇香港地址同香港電話呀，我諗住你哋送貨前會有人通知我，但我哩個星期唔會落嚟香港，要照顧bb，我成日落去上水資X堂買嘢，佢哋知我係邊個，應該會幫我收貨㗎！」
🕵🏻：「小姐，我哋就係落過舖頭，佢哋唔知哩個係咩人，唔會幫人收貨㗎！」
🙍：「哦，咁你可唔可以下星期再約我，我下星期會落嚟香港買嘢。」
🕵🏻：「咁我要搵公司同事聯絡你啦唔該。」

對此，該名速遞員不禁表示：「哩一刻我心裡簡直講咗N句嘅粗口……咁借問聲我哋又點送到貨俾你呢？」

網民：彈單兼黑名單佢

此事引來網民熱議，不少人認為事件十分誇張，「彈單喇，黑名單佢添」、「連順豐幾十蚊都想慳返」、「成個世界圍住佢轉㗎嘛」。另有網民不解：「點解無香港電話會接單？應該鬧返出call嗰班人啦！擺明玩嘢！」