【心酸對話】30年屋邨髮廊難敵貴租將結業 熟客婆婆：我都要入老人院

本港近年來有不少小店因「捱唔住」貴租而結業，街坊情亦漸漸被現實沖淡。有網民日前到一間在寶琳屋邨經營了30年的髮型屋剪頭髮時，目擊一名熟客婆婆向老闆指自己即將入老人院，對方亦回應指因難敵貴租，準備於9月結業。網民大感心酸，遂在網上討論區「連登」分享此事，「打咗咁長都預冇乜人睇，但純粹想講宜家呢個社會真係好悲哀。」

婆婆入老人院 髮型屋將結業

樓主以「頭先剪頭髮 聽到老細同個熟客傾計好心酸」為題發文稱，自己已光顧該髮型屋數年，日前她等待剪頭髮時，看到老闆與一名前來剪髮的婆婆聊天：

婆婆：「我就快搬喇，之後都來唔到探你。」
老細：「婆婆，我都做到九月唔做喇，租金太貴都係頂唔住喇。」
原來個婆婆幫襯咗好多年
但下星期要去搬去住老人院 因為屋企冇人可以照顧佢
老細繼續講：「婆婆，妳臨搬嘅前一日過來揾我，星期幾都冇所謂，我幫妳洗個頭，唔收妳錢！妳幫襯咗咁耐，我都唔捨得妳。妳去到老人院都好嘅，有人煮野妳食、照顧妳，但妳記住去到要郁多啲呀，唔好剩係瞓喺度。」
婆婆聽到好開心，話：「多謝你呀！」
老細又話：「多咩謝呀，我多謝妳就真。」

婆婆：不想住老人院

「聽聽下真係好心酸。」樓主指出，她聽到婆婆稱自己不想住老人院，「但香港畀長者嘅支援又真係做唔到啲咩，可能你話有得住老人院都好過排極都冇位，但講真，有仔有女，有住咗好耐嘅屋企，可能只係差咗個人煮飯俾自己，睇住自己，邊有人想去住老人院？」其後，當婆婆的女兒來接婆婆時，老闆再次提出免費洗頭一事，「但個女答：『睇下有冇時間帶佢來啦，未必有時間。』政府又理唔到班老人家，仔女就為賺錢生存而忙到冇時間。望住個婆婆，真係會好心酸。」

老闆：租金太貴做唔住

樓主續指，髮型屋老闆向她解釋了要結業的原因，「佢話：『做唔住喇，租金太貴。12月先過期，所以未傾個租金，但隔離間補習社傾咗要加40%喇。你唔加我都未必做得住，你再加租我更加唔駛做，唯有做埋呢幾個月試下搵過個地方。老實講，我都差啲頂唔住（想喊），最傷心係聽到婆婆話等我精神好啲，我返來探你呀！我一諗到佢有心來探我，我都冇得做，嗰種感覺我唔識講，真係好唔舒服。』」她認為，該屋邨商場有點舊，人流亦不算太多，「但都加40%，真係就算有心做都無奈地要放棄」；就算做開街坊生意，與熟客之間有感情，但大財團都不會理會，「於是就愈來愈多有人情味嘅地方要逼住消失」。

最後，她希望大家可以多些關心長者及支持小店，「我知我喺度呻都冇乜用，但如果身邊有為生存好努力、對人好嘅老人家，可以嘅話就關心多啲佢哋，照顧一吓佢地。又或者有啲良心小店，可以就支持下，唔係等到上晒電視話就執先去打個卡。」

網民：社會好病態

此事引來網民熱議，不少人亦大為感觸，「舊鋪仔買少見少」、「一直剪頭髮幫襯舊式舖，人情味同個感覺都好舒服」、「最慘就係細鋪越執就得返連鎖野可以幫襯，連鎖越好生意開得越多，加租就更誇張」、「連鎖店帶來方便，但永遠畀唔到人情味」、「個社會最令人心酸嘅係，所有明明應該心酸嘅嘢大家都睇到麻木晒」、「樓主好簡單一個case已經可以睇得出好多個社會議題同埋呢個香港社會有幾病態」。另有網民指出，如果家中無人照顧，長者入老人院是無可厚非，亦未必是壞事，但批評本港老人院質素太參差是問題癥結所在。