愛女天韻激似亞男 祖藍︰估唔到DNA輸畀太太

王祖藍與太太李亞男前晚為囡囡Gabrielle搞百日宴，並公布女兒的中文名叫王天韻，寓意她是「天上嚟嘅音樂」。至於小天韻的樣子愈大愈似媽媽，祖藍更指女兒在同齡BB中算係高。不少網友讚祖藍一家三口超幸福；更喜見小天韻乖巧又可愛！

王氏夫婦前晚假迪士尼樂園酒店筵開40席，為Gabrielle舉行百日宴，不少圈中好友都前來到賀，包括蔡少芬一家四口、何超蓮、苟芸慧、方力申、薛家燕等。Gabrielle雖然全晚要跟現場眾多賓客合照，但全程未有扭計，表現合作。祖藍席間更自爆︰「我拍緊《你咪理，我愛你！》嘅時候，阿女只要一聽到戲入面嘅音樂，就會踢佢媽咪個肚。我覺得佢係天上嚟嘅音樂，所以個名叫做王天韻。」

身高贏在起跑綫

祖藍之後與太太結伴受訪，他感恩女兒愈大愈似太太︰「初初BB出世時未收水，好似我咁一PAT嘢。後來佢收水，我日日都祈禱似我老婆，結果愈嚟愈似我老婆，我覺得係神迹嚟。」他戲言自己的DNA都好強，但估唔到仍輸給太太。身旁的亞男即笑指丈夫應感激她，祖藍聞言亦向太太施冧功︰「好多謝你呀！王家因你而改變！醫生仲話我個女喺同齡嘅BB嚟講，100個小朋友有90個都畀佢矮，算係高嗰班！」

撰文︰Steven

協力︰Terri

編輯︰黃寶恩

美術︰Simon