婚後無Keep Fit 發福阿嬌：老公覺得我唔肥

新婚的鍾欣潼（阿嬌）經常與老公賴弘國放閃曬恩愛，前晚她出席品牌活動時，亦明顯出現「幸福肥」，她坦言自從婚後便沒有keep fit，雖然老公大讚她身形標準，但身邊朋友取笑她胖了不少，令她下定決心減肥。

鍾欣潼前晚出席鞋履活動，穿上連身裙的她身形圓潤不少，她直認婚後沒有刻意keep fit：「我今日開始減肥！我成日同老公講要減肥，佢叫我唔好聽人講，話我唔肥。不過好多朋友忍唔住話我肥得過分！」是否賴弘國喜歡她有肉地好攬？她笑說：「因為我自己肥就會顯得佢瘦啲！」

不過阿嬌自言懶惰，不會與老公一起做運動：「因為大家玩唔同類型運動，無必要一齊做，依家先節食再做運動。」她笑指早前有雜誌指老公心廣體胖，令老公有點生氣：「佢仲追問我係咪得罪咗媒體，所以咁寫佢。」提到昨日是白色情人節，阿嬌自言沒有節日觀念，笑說如果給老公知道，便會花錢買禮物：「我覺得只要講句『情人節快樂』已經好開心。」

阿Sa唔需要結婚

另外，盛傳好姊妹蔡卓妍（阿Sa）將與男友石恆聰結婚，阿嬌自言不相信：「阿Sa依家個狀態好開心，而且婚又結過，唔需要囉，兩個人一齊開心就得。」而石恆聰胞妹石佩藍前晚亦出席活動，提到哥哥與阿Sa的結婚傳聞，她說：「暫時無聽過，父母都好開通，唔會催婚。」

採訪︰Pauline

編輯：李潔盈

美術：顏玉玲