情人節孖男友賞雪 薛家燕冧爆︰拖手好得意

向來旺氣十足的薛家燕，昨日以經典「龍袍」加身look出席商場活動時，笑言新年期間被當成「娛樂圈財神」，成為各大商場爭相邀請的嘉賓對象。但工作忙碌的她亦不忘跟圈外男友慶祝情人節，拍拖旅行欣賞雪景，非常浪漫。

薛家燕、梁嘉琪與胡諾言昨日到油塘出席商場開年活動，家燕姐笑言獲不少商戶支持，邀請她擔任開年活動嘉賓，因此農曆新年期間仍要工作，只放了幾天假。問家燕姐是否豬籠入水？她笑說︰「好多商場直情叫我只要到一到，就可以收一封大利市，不過我就唔係全部都應承，真係要好好朋友先得。」

提到情人節如何慶祝？家燕姐甜絲絲表示，跟拍拖多年的圈外男友到內地旅遊，去落雪的地方浪漫慶祝。她冧爆說︰「情人節人哋拖手，我又拖下手咁囉！我覺得好得意，因為其他人拖手嘅都好後生。」她又表示特別往欣賞賀歲片《新喜劇之王》及《你咪理，我愛你！》，相當捧場。

梁嘉琪新招抗催婚

同場的梁嘉琪早前投資年宵攤位，售賣與朋友設計的潮語咕𠱸，她笑言銷量十分理想，部分潮語更相當適合自己：「我哋特別設計咗一句『勿提啦！』畀大家拜年時面對親友，呢個咕𠱸可以年年攬住去拜年。」她坦言今年拜年時少不免被親友催婚，所以特別設計這個咕𠱸給自己使用。提到首次擺年宵檔，嘉琪表示準備過程相當辛苦，所以明年會否再擺年宵，她也要慎重考慮。

採訪、攝影︰Pauline

編輯︰李潔盈

美術︰招潤洪