【老婆怨無自由】與妻月入4萬住夫家 港男呻：無樓唔好結婚

香港樓價高企，不少年輕人無法「上車」，婚後需與父母等家人同住。一名27歲男網民日前在網上討論區「連登」以「無樓真係唔好結婚」為題發貼，指因未能買樓上車，婚後跟太太與自己父母同住。惟太太搬進夫家後，卻不時埋怨沒自由，更抑鬱至哭起來，令他十分煩惱，「講真，今時今日男人都好難去做」。此貼一出，隨即引來其他網民熱議。

樓主表示，與同歲的太太結婚一年，「老婆搬左黎同我父母一齊住，父母間中唔喺屋企瞓，間中會去我哥到湊細路，周末就同埋個細路返嚟瞓」；他們住在私樓，「2房，280-300呎左右」。太太經常埋怨「無晒自由」，而且更會「嫌三嫌四」、「又話飯菜唔啱食」，「琴晚老婆話返工已經好抑鬱，呢家返到屋企更抑鬱，見到咁多人係屋企，好唔開心...琴晚訓教仲爆喊」。

樓主續指，太太經常叫他買樓，「最多問我屋企人借」、「老婆比晒面色呀，佢比好大壓力」；但因他之前已花了一筆錢裝修，仍未「回血」，「樓價跌，你都要有錢拎首期，唔係就跌就好易入」。如果租樓，他認為是難以儲錢，「我心諗，有得住點解唔儲多啲？」最後，他表示：「最慘……我唔知點搵人去傾，搞到我好似錯晒咁樣，老婆又喊苦喊忽，唔理我。無樓真係唔好結婚。」

{{hket:inline-image name="marry3112201815.JPG"}}{{/hket:inline-image}}

對此，不少網民對樓主表示同情，亦有不少男網民感同身受。有網民認為，樓主應該要租樓住，「買唔到都建議租，月入4萬正常負擔都應該得，仲可以儲到錢」、「成日話租都儲唔到錢買樓，香港大把家庭都係租架啦，婆媳關係除左搬出去根本解決唔到，住埋一齊，3方都辛苦」、「同埋你父母一齊生活真係唔係人人都接受到，一定要租㗎啦，如果唔係遲早離婚」。

不過，亦有網民質疑樓主當初未有想清楚便結婚，「呢個問題其實結婚前要講定，不過好多人底估左一齊住係幾多問題，又唔想因為呢啲嘢搞到分手，結果結左婚之後就瀨嘢」。有網民更「放灰」表示：「你咪算好，起碼係同老婆一間房，香港地唔係個個都有一間自己房。」、「香港地真係唔係個個都買到樓，呢個係現實。好好利用手上嘅錢過好啲既生活好過啦。」