冧未婚夫Oscar 江若琳蜜月睇英超

下星期日出嫁的江若琳（Elanne），昨日到海港城出席聖誕活動，與多位小朋友一齊唱聖誕歌。她表示很多婚宴細節仍未準備好，但未來老公蕭潤邦（Oscar）熱愛足球，已決定蜜月之旅暢遊英國睇波。

江若琳以一身紅噹噹打扮現身，她說今次是婚前出席最後一個公開活動，下次已經成為蕭太！然而大日子即將到臨，Elanne仍為婚宴而手忙腳亂，她說︰「賓客座位表仲未搞掂，仲有啲喜帖未派畀賓客。一年前宣布結婚，滿以為有充裕時間，突然發覺呢一日就在眼前。」

Elanne苦笑謂沒有時間做運動，「最近同劉美君一齊拍劇，以為佢咁弗，會食得好清淡，點知日日開工都好多美食，我又跟住佢一齊食，希望呢個禮拜努力收身，以最弗狀態舉行婚禮。」

婚紗露玉背

問Elanne所穿的婚紗是否性感？她笑言一早預計12月天氣較凍，婚紗不會太性感，但會露少少背脊給大家睇。

去年她和Oscar前往英國睇波樂而忘返，故她已買定機票在27日起程飛往英國，展開16日蜜月之旅重溫英超夢。「Oscar已plan好去英超球場睇波，又或者去埋西班牙。（順道蜜月造人？）順其自然啦，總之有BB都係一種緣份，如果造人成功都好開心。」

採訪︰Pauline

編輯：陳禮恒

美術：招潤洪