譚玉瑛寸爆鼎爺做「八婆鼎」

李家鼎（鼎爺）與譚玉瑛昨午到尖沙咀出席無綫節目《阿爺廚房》第三輯發布會，二人多次合作默契十足，鼎爺更大搞氣氛，踢爆好拍檔竟為他改花名叫「八婆鼎」，認真大膽。

向來廚藝出眾的李家鼎，昨日在活動上即場展示一流刀功，除了薄切蝦外，更將豆腐切成菊花幼絲狀，令現場人士拍爛手掌。《阿爺廚房》第三輯將於下周一首播，提到節目在三年間已開足三輯，這對好拍檔笑言已默契十足，雙方更不時互窒，大搞氣氛。譚玉瑛說︰「大家到咗呢個年紀，都知道有啲乜應該講，唔應該講！」

鼎爺昨日亦開腔爆大鑊︰「我哋喺順德拍嘢，我有時會留意其他嘢，識嘅嘢多啲，佢（譚玉瑛）就話乜你咁八嘅。」鼎爺更指譚玉瑛原來是「擦得之人」，他說︰「佢一日食足七餐都可以唔肥！」

聖誕各有各吸金

聖誕節將至，不少藝人乘機登台商演搵真銀，問到二人如何度過佳節，雖然鼎爺自稱沒有多想如何慶祝，譚玉瑛即踢爆對方要登台吸金，又說︰「我已經接咗主持工作，會工作中過聖誕！」提到聖誕搵銀定必豬籠入水，鼎爺亦「回禮」暗寸好拍檔︰「邊係，我邊似得你（譚玉瑛）咁口齒伶俐呀。」

另外，早前鼎爺大仔李泳漢太太誕下細女，湊成「好」字，李泳漢更指鼎爺錫孫女錫到出面，鼎爺聞言即表現冧爆。可會與孫女齊齊過聖誕？他回應︰「我都希望，但係聖誕節同平安夜都未必得閒！」

撰文︰Steven

編輯︰李潔盈

美術︰梁政敏