唔在乎輸人氣王 姜濤想向軒仔「抄牌」

男團MIRROR成員姜濤與張敬軒（軒仔）早前在「Yahoo搜尋人氣大獎2018」力爭「人氣票王」，票數叮噹馬頭，前晚最終公布由軒仔得獎。姜濤笑言輸掉獎項不要緊，反而最開心軒仔記得自己，更心思思想向對方拎電話號碼。

「Yahoo搜尋人氣大獎2018」頒獎禮前晚在尖沙咀舉行，ViuTV節目《全民造星》奪得「人氣綜藝節目獎」，監製花姐與男團MIRROR現身領獎，姜濤更贏得「圖片搜尋次數最多的香港男藝人」，不過他在「人氣票王」大獎卻爭輸張敬軒。姜濤笑說︰「我無諗過自己（人氣票王）拎第二，都無乜留意投票，始終關心團隊嘅事多啲。不過身為新人，有人留意好開心，而最開心係張敬軒先生記得我！」

同新人溝通有障礙

問姜濤見到軒仔會如何？他笑說︰「我諗緊一陣點同佢講嘢，第一句諗住講『你好』。（問軒仔拎電話？）如果可以就好啦，我試下！」提到MIRROR在叱咤頒獎禮的走勢不錯，姜濤開心說︰「我比得到個人成績仲開心，希望未來日子更加多人認識我哋。」

及後軒仔在後台受訪時，表示已見過姜濤，他搞笑說︰「姜濤見到我話好緊張，但佢唔知我比佢仲緊張，我叫佢唔好行咁埋，因為年紀差距太大！不過MIRROR真係好有禮貌。」提到他鍊贏姜濤得人氣獎，他笑指因對方粉絲「敬老」，自己才險勝︰「寒冬將至，為免老人家平安鐘長鳴，所以佢啲fans收手，我啲fans都撳到手痛，但我覺得MIRROR係今年人氣王！」

問軒仔有何心得傳授新人？他說︰「我哋講嘢用字好唔同，頭先同MIRROR講嘢，我唔係好聽得明，一臉黑人問號囉。」他又自爆近日做完HIFU美容療程︰「我有幾個法寶對付啲新人嘅，防止地心吸力，盡量抬高個頭同早啲瞓。」

採訪︰Pauline

攝影︰林良明

編輯︰李潔盈

美術︰梁政敏