薛凱琪北上掘金變鐵人

薛凱琪（Fiona）和蘇麗珊前晚出席化粧品牌活動。Fiona早前創立個人服裝品牌，至今生意漸上軌道，為此她希望鼓勵年輕人創業。至於外形多年來停留在少女階段的蘇麗珊，則說無意改行性感路綫，只求演不用減肥的角色。

薛凱琪剛在成都返港，此行有很大驚喜︰「我獲邀擔任成都新經濟城市品牌代言人。負責人覺得我符合要求，好適合做代言人。」

她指此舉證明努力並沒有白費，她亦鼓勵年輕人創業，特別是女性，希望她們發展自己的事業。「細個覺得自己咩都唔得，但係只要努力同相信自己就一定得。」

Fiona又透露最近就似17歲初入行時精力無限，她笑謂︰「啱啱喺內地拍嘢、影相，一星期平均每日只係瞓三個鐘，當中試過連續34個鐘無瞓過覺，好癲！噚晚凌晨三點幾由北京飛返香港出席呢個活動。助手都話我係佢識嘅人當中精力最好嗰個，仲問我可唔可以唔好咁好精力，佢同我做嘢辛苦好多，要請多幾個輪班！」

蘇麗珊唔想減肥

蘇麗珊以Tube Top現身，跟以往鄰家女孩造型完全不同，問到是否改變形象？她尷尬地笑謂︰「廿幾歲仲着校服，都有啲唔好意思，今日見一個導演，佢問我平時演咩角色，我話18、19歲中學生，所以依家都想改變下，做大學生都好。」問她可有想過行性感路綫？她笑言︰「我無乜身材行性感，又唔夠瘦。（Keep Fit？）好難，我好鍾意食嘢，尤其鍾意食麵包，本身都好多運動，但做極都唔瘦，其實自己唔覺得肥，但周圍嘅人，甚至我媽咪都勸我唔好再食嘢。」她曾幻想做一個不用減肥的演員，奈何身邊太多人給予壓力，加上上鏡不好看，最後當然不會成事。

撰文︰Pauline

編輯：黃卉彤

美術：梁政敏