傳太太有喜 古巨基笑答：我返屋企問下

古巨基（基仔）前晚在油麻地一間懷舊冰室，舉行新碟《維多利亞》發布會。近日有報道指基仔太太Lorraine孕味濃，基仔前晚沒有否認，只笑笑口表示要回家向太太了解。

古巨基新碟以香港故事為主題，所以首度選址懷舊冰室獻唱新歌，基仔更乘機狂飲紅豆冰。他笑說：「我好鍾意食雜扒、飲紅豆冰，不過古太（Lorraine）話我要出碟同宣傳，明年又要開演唱會，所以佢嚴格管制我嘅飲食。」提到Lorraine近日被傳懷孕，基仔沒有承認或否認，只說：「我都唔係好了解，等我返屋企問下佢先。（未講得？）我哋喺屋企好少傾偈，我要再問下。」

基仔將於明年四月在紅館開演唱會Part 2，提到政府考慮修例，以實名制購票方式打擊黃牛黨，基仔說：「我覺得要諗個方法打擊黃牛黨係啱，但點執行都仲要再傾。」但基仔老友黃子華反對實名制，認為侵犯私隱，基仔表示：「到底點樣執行就要傾，例如逐個觀眾驗票，時間會唔會好長？所以要再傾可唔可行。」

拒出現「絕望座位表」

問基仔會否減少個唱的內部認購門票數量？他坦言會將自己的門票拿出來公開發售，又承諾個唱絕對不會出現「絕望座位表」。他說：「我當然希望早啲推出打擊黃牛黨嘅方法，但我個演唱會應該趕唔切，身為表演者，都想歌迷用正價買到演唱會飛。」他表示就算只供網上發售門票，黃牛黨一樣可以利用程式搶飛炒賣，所以若各大唱片公司代表與政府部門商討就最理想，但仍需多方配合。

採訪︰Pauline

攝影︰林良明

編輯：李潔盈

美術：梁政敏