Captain Nancy開騷 基仔狂摸家燕「寶石」

薛家燕一連兩場《愛你無限60年演唱會》前晚假紅館開鑼，台上台下星光熠熠，胡楓、陳寶珠、古巨基、福祿壽及謝天華等分別同家燕姐合唱，不時大放笑彈。

家燕姐一邊跳十字步一邊唱出新歌《Captain Nancy》，為個唱揭開序幕，她並與「七公主」中的馮素波、沈芝華、陳寶珠及王愛明合唱《情花開》和《莫負青春》。缺席的蕭芳芳錄音賀家燕姐，「希望到你入行100年再開騷同早日嫁出去。」其他好姊妹即笑言︰「你年頭娶新抱，年尾又開騷，畀我哋唞下先，你遲啲先嫁啦。」

古巨基與家燕姐合唱《友共情》，他竟大膽當眾摸家燕姐額頭上粒癦三次，基仔表示︰「原來第7粒寶石喺呢度，呢粒寶石好強，每次經過佢身邊都感受到個氣場。」

演唱會尾聲，輪到家燕姐三位寶貝仔女上台獻花兼唱《You Raise Me Up》送給媽咪，令家燕姐感動落淚，她說︰「佢哋三個，細個畀人話係包袱，但佢哋係我嘅推動力。」最後唱出《皆大歡喜》為個唱畫上完美句號。

撰文︰倪小珊

編輯︰陳禮恒

美術︰梁政敏