郭富城默認再做老竇

郭富城昨午在中環出席AIA Vitality廣告發布會，席上大談健康生活，又即場示範伸展運動。剛在廣州開完巡唱的他表示，一星期最少跑步三至四日，每日做30分鐘帶氧運動，例如游水、踢波及打乒乓波等，至於飲食方面，則盡量少油少糖少鹽。

提到太太方媛（Moka）日前現身一個慈善晚宴時，明顯腹部微隆似懷第二胎，城城笑謂︰「唔講得住，但都快㗎喇。無論點都好，多謝大家嘅祝福，因為係開心事，畀多少少時間我就會向大家公布。」當記者恭喜他時，城城更連聲回應多謝。

此外，城城透露完成廣州巡唱後，將到武漢及南京演出，然後聖誕期間會放假。他坦言做歌手比較幸福，因為總會有休息時間，可讓他陪伴家人。他又表示每日都會做運動，問他目前有幾多嚿腹肌？他說︰「一直都有腹肌，不過之前試過為電影增肥無晒，但拍完之後，只係用咗一星期做運動，操番綫條出嚟。（會陪囡囡一齊去公園跑步？）暫時未，我由睇住佢爬，到依家識行，小朋友成長真係好快，成長過程係好sweet同埋好幸福，呢一刻我好感恩，最緊要係健康。」