直認「生鏽」得好快 麥明詩自嘲︰多謝公司畀我獻醜

麥明詩（Louisa）日前在台慶表演跳舞時狂甩beat而遭到網民恥笑，昨日Louisa出席活動時承認自己同時要兼顧表演及主持比較吃力，她更忍不住自抽︰「多謝公司畀機會我獻醜。」

麥明詩昨日與劉佩玥、麥美恩及陸浩明等出席問答比賽《一帶一路一狀元》記者會，對於連日被網民「舞」辱，Louisa苦笑謂︰「做得多主持，好耐無跳舞，對上一次跳舞已經係選港姐時，呢個年紀生鏽得好快，我都唔想，好多方面都有好大進步空間，多謝公司畀機會我獻醜。」

Louisa直言有重看自己的表演，她笑笑口說︰「我唔睇啲人都會send畀我。（慘不忍睹？）現場睇無咁衰。（自己有心無力？）我重申一次，唔好意思，因為我落機無耐，錯過排練時間，亦要兼顧主持，無咁多心神去諗啲step點跳，亦都係我經驗不足，如果係一個有經驗主持，又唔使花費咁多心神，我丟低咗跳舞好耐，主持又啱啱pick up，所以出現呢個問題。」

撑好姊妹夜蒲減壓

至於劉佩玥被問到有傳媒拍到其好姊妹陳瀅夜蒲時玩到險甩鞋，她即力撑對方︰「咁年輕人都要玩下嘅，香港步伐咁急促，讀書之外，得閒都要輕鬆下，不過我好少夜蒲，因為我唔飲酒，主要陪佢哋玩。」

撰文︰倪小珊

編輯︰黃卉彤

美術︰梁政敏