盛傳有喜 胡杏兒旅行乘機造人

胡定欣與胡杏兒昨日到尖沙咀出席活動，早前一家三口到馬爾代夫旅行的杏兒，盛傳懷上第二胎，她笑說︰「只係傳啫，如果有好消息一定講。（在馬爾代夫造人？）咁都要造嘅，特別係對住咁靚嘅環境。」在旁的定欣笑說：「喺咁靚嘅地方，成功率一定仲高。」

提到黃智雯連贏新加坡及大馬視后，定欣與杏兒表示「胡說八道會」會為對方慶祝：「如果佢贏埋香港視后，到時開聖誕派對一次過慶祝。」她們笑言會要求黃智雯出錢宴請大家。另外，杏兒自言幫單身的定欣吼實筍盤：「我幫定欣留意下有無好男仔，但要襯到定欣都唔易。」