余德丞想同碧咸傾波經

「萬人迷」碧咸（David Beckham）前晚旋風式襲港，出席帝舵表活動，同場的「波牛」余德丞（Dickson）興奮向偶像集郵外，更希望可跟對方傾波經。不過早前踢波昏迷的Dickson，現時仍未可以落場踢波。

碧咸、余德丞、陳凱琳及袁澧林等前晚到金鐘出席活動，穿上西裝的碧咸一出場即獲全場歡呼，他亦不停揮手打招呼，又親切跟其他嘉賓傾偈，更提醒袁澧林行紅地氈要小心，盡顯紳士風度。碧咸全程只閃現五分鐘，但對現場人士邀請合照都有求必應，親切友善。

成功跟碧咸合照的余德丞（Dickson），開心指一直視對方為偶像：「我細個已經睇碧咸嘅『七旋斬』，亦有收藏佢嘅波衫。佢真係好有型，媽咪話佢着件白底衫，都有型過我成套西裝！」他希望問碧咸對曼聯今季表現和領隊摩連奴的看法，但又怕對方講得太專業。至於早前一度踢波昏迷入ICU的Dickson，表示日前重返出事的足球場，探望救他一命的AED機及支持隊友，更踢了兩腳波「止痕」。他笑說：「我特登唔帶波boots去，希望斬腳趾避沙蟲。」

陳凱琳想紋仔女名字

同場的陳凱琳大讚碧咸的紋身很man，問她覺得老公鄭嘉穎與碧咸誰更靚仔？她說：「我一定揀嘉穎！」她又謂接受紋身：「愛的紋身都可以，第時有仔女，都想學碧咸咁紋仔女個名。」

撰文︰Pauline

編輯：李潔盈

美術：梁政敏