《特警新人類》20周年 吳彥祖想搵霆鋒拍續集

近年專注拍美劇的吳彥祖（Daniel），前晚偕衛詩雅、內地演員王千源等，在江門出席新片《限期破案》開鏡。吳彥祖坦言十分掛念香港的拍戲模式，又透露想找好友謝霆鋒及馮德倫拍攝《特警新人類》第三集。

吳彥祖近年主力參演美劇《荒原》，經常在愛爾蘭拍劇，提到事隔三年再拍華語電影，他坦言十分想念香港：「我好掛住香港嘅拍攝模式，效率好高，亞洲電影權力都喺導演身上，美國拍戲分工好細，大家相處時間唔多。雖然拍美劇好玩，但我喺香港出身，好尊重港產片，其他地方拍唔到香港味道。」

吳彥祖表示今次在內地拍戲，妻女沒有同行：「今年係囡囡第一年返幼稚園，我幫佢報讀中文學校，因為想佢識多啲中文。我唯一後悔自己細個無學好中文，唔想個女都係咁。」另外，提到早前往希臘拍攝謝霆鋒的節目《鋒味》，吳彥祖笑言跟霆鋒已近四年沒有見面︰「大家傾番仔嗰陣啲往事，好多回憶，都幾touching。我諗番都眼濕濕，我哋仲傾合作，提過想拍《特警新人類3》，因為今年套戲20周年，想預埋馮德倫拍套《特警老人類》。」

衛詩雅狂操男人身形

同場的衛詩雅擔正做女主角，她表示要應付大量打戲，特別在開拍前兩個月操肌︰「健身教練話我好癲，但戲中只得我一個女仔，我唔想輸畀男仔，佢哋手瓜等於我腳咁粗，所以我飲奶粉，戒油鹽糖，依家我啲衫嘅膊頭位已經唔啱身，好似男人咁。」提到與吳彥祖有不少對手戲，她笑說：「幾年前拍電影演過佢老婆，仲死埋。佢不嬲都咁靚仔。」

撰文︰Pauline

編輯：李潔盈

美術：招潤洪