做觀眾睇騷變嘉賓 黃子華笑農夫夠蠱惑

組合農夫前晚在旺角麥花臣場館舉行第三場《18歲生日快樂演唱會》，黃子華現身做觀眾睇騷，但被農夫邀請上台，C君更乘機要求合照。子華聞言笑說︰「真係無免費騷睇！至少要我講半個鐘。」

農夫前晚開騷前，先逐一介紹現身捧場的圈中好友，包括張繼聰與謝安琪、唐詩詠及黃子華等。當子華上台時，全場觀眾即起哄歡呼，C君與陸永除了搞笑要求合照外，又想子華在台上繼續講，子華即說︰「每次都要做番啲嘢，仲要旺角最蠱惑嗰兩個人（農夫）喺度！」說罷他便落台睇騷。

視對方如同行

農夫及後在台上感謝曾幫助他們的人，包括經理人DJ Tommy、鄭裕玲（Do姐）及子華等，當他們說到「多謝Do姐拍檔黃子華」時，在台下的子華即扮Do姐口吻罵︰「賤格！」陸永又表示從小到大都買飛睇子華的棟篤笑，子華用口形讚他們乖。不過，農夫自爆曾在慶功宴上，與子華傾足六個鐘，子華忍不住笑罵二人「講大話」，農夫認衰說︰「其實係五個鐘。」由於子華在場，農夫特別將encore環節改為一段長達20分鐘的棟篤笑，向子華致敬。完騷時，子華走到台邊與他們攬攬，又忍不住拎咪說︰「農夫係同行，如果佢哋再做棟篤笑，如果認真去做，我盡量在場。」獲全場拍手支持。

騷後農夫受訪，表示得知子華捧場，所以特別安排一場驚喜棟篤笑給對方。C君說︰「棟篤笑好難做，好多嘢記，真係好緊張。」陸永說︰「喺我哋18歲生日會上，送份禮物畀子華都算係咁，希望佢鍾意啦。」

撰文︰Pauline

編輯︰李潔盈

美術︰梁政敏