影水底婚紗相 阿嬌化Halloween粧

鍾欣潼（阿嬌）前晚出席電影《失蹤》煞科宴，目前正籌備婚禮的她大方透露，剛與老公賴弘國從墨西哥影婚紗相返港，不過阿嬌卻形容個粧十足萬聖節造型，連自己看到都驚！

阿嬌表示︰「當地好靚，去咗五日，我係冒生命危險咁做，因為水底得十幾度，好凍、好辛苦，浸咗四個鐘。」阿嬌笑言水底婚紗相的靈感來自電影《侏羅紀公園》，不過化粧後她還以為去萬聖節派對︰「化粧師堅持話水底化粧係唔同，我化黑咗幾度，老公就化白咗，落水前都唔敢影相，返到酒店望到塊鏡，我自己都嚇親，本來想喺餐廳食嘢，但都好想快啲返上房。」

日前阿嬌和賴弘國的擬結婚通知書曝光，將於12月18日註冊、20號擺酒。阿嬌表示仍未派喜帖，只發了電子請柬，回禮禮物亦準備中，被問到打算幾時停工準備結婚，她打趣說︰「無休息，做到婚禮前，哈哈！其實之前喺美國已經做晒所有儀式。」至於幾時生仔？阿嬌說︰「兩年後先啦，同老公有共識唔生住，啲人話我有孕味，其實唔係，我會減，結婚前會瘦。」

JJ老公被追債無辜

在新片中扮CID的賈曉晨（JJ），專程由北京來港出席煞科宴，提到早前老公樊少皇被匿名信追債200萬，JJ稱︰「好無辜，係佢畀人借咗幾百萬，人哋無還，反而令佢畀人追債，已經報咗警同交俾律師處理，之後都會搵律師去追番筆錢。」她又說，今次老公被由細玩到大的朋友招致名譽和金錢損失，十分傷心。

採訪︰Pauline

編輯︰黃卉彤

美術︰梁政敏