慈善個唱網上直播 Eason︰盡地一煲搞大佢

陳奕迅（Eason）與DUO團隊將在本周六（27日）於中環海濱摩天輪舉行音樂會，由於音樂會屬慈善性質，不設售票，Eason為免無飛在手的樂迷失望，決定屆時在YouTube及Facebook等網上平台免費直播，實行好歌齊齊聽。

陳奕迅將於本周六舉行《eason and the duo band - L.O.V.E. is L.I.V.E.》音樂會，由於大部分門票只招待11個青少年慈善機構，加上現場只有1,600座位，Eason跟公司商量後，決定屆時在自己的官方FB、官方YouTube頻道，以及商台FB等全程直播音樂會，讓樂迷安坐家中亦能欣賞個唱。

Eason表示事前已與YouTube及Facebook方面溝通，希望屆時直播順利，他笑說：「我哋一早向有關方面申請，條水管整粗啲，到時網上流量暢順啲，畢竟係第一次做直播騷，無論如何都會盡地一煲，搞大佢！」

邀請彭國柱睇騷

提到屆時為配合直播，要增添拍攝隊伍，問到慈善騷成本多少？Eason說：「唔知，無睇條數，唔會幾千萬啦。其實今次搞騷好開心，就算病咗都照做，27號無得改期！」他表示當晚六時開騷，預計唱兩小時。另外，早前Eason邀請偶像、前無綫新聞主播彭國柱睇騷，他笑說：「我畀咗四張飛佢，但佢只係拎兩張，真係好正！」

撰文：Pauline

編輯：李潔盈

美術：招潤洪