新手爸爸幫唔到手 余文樂湊仔負責娛樂組

余文樂（阿樂）昨日以代言人身份到澳門出席全球首個室內全電能車特技滙演《狂電派》的記者會，他不諱言男人天生鍾意速度和車，就似女人愛買手袋和鑽石，但阿樂表示自從囝囝余初見出世後，許多事都會以家人為大前提，而他在家主要是陪囝囝玩。

大會安排阿樂坐在跑車內，由車手接載在現場兜了幾個圈，他亦在綵排時，見識難度高飛車。阿樂是愛車之人，喜歡開快車的他，做了人夫和爸爸後，會否比以前錫身？他承認會顧及家人感受，亦會留意汽車排氣會否出現氣油味，知道今次滙演用的是電動車後，就可以安心帶家人來欣賞。

拍戲不能錫身

至於錫身，他直言跟以前一樣︰「基本上劇組都唔畀，演員受傷會影響拍攝進度。媽咪就一向唔鍾意我拍危險戲，太太就好少少，有時知危險會喺現場陪我，今日佢都有嚟，阿仔就無嚟。」作為新手爸爸的阿樂，被問到湊仔時會否很緊張？他承認心力較疲累，因為大部分時間自己湊，更笑言︰「換片我唔叻會被趕走，但有份幫手沖涼同埋玩，因為我係娛樂組。」

撰文︰Pauline

編輯︰黃卉彤

美術︰梁政敏