出DVD版權費超貴 軒仔收錄串燒歌花3百萬

張敬軒昨日在銅鑼灣舉行《HINSIDEOUT》演唱會DVD簽唱會，軒仔表示今次出DVD經歷一波三折，皆因翻唱歌曲的版權費實在太貴，單是國際天后Beyonce一曲《Crazy In Love》的版權費便要100萬港元，令他忍痛刪走此曲，未能收錄在DVD。

昨日軒仔與粉絲大玩互動遊戲，有粉絲更以軒仔的「降兩度」造型現身大騷舞姿，模仿演唱會上的經典片段。軒仔即場獻唱《青春常駐》，又跟全場粉絲影大合照，逐一為歌迷在DVD上簽名留念。

活動後，軒仔大呻今次出DVD困難重重：「因為『降兩度』Opening唱咗Beyonce同埋好多國際天后嘅歌，好似美國、印度、韓國、泰國等，所以收錄喺DVD就要畀版權費，單單係Beyonce隻歌版權費都要100萬，所以無辦法收錄入碟。其實首Medley歌曲嘅版權費連製作費都要200、300萬元，係一個代價！」軒仔坦言今次的個唱DVD可謂「賣大包」，因當中合共三隻DVD及三隻CD，「我知買實體產品嘅人愈來愈少，所以想做得吸引啲。」

為頒獎禮拉票

提到年尾樂壇即將派成績表，去年沒出歌的軒仔，今年相當積極，趁年尾推出新歌《百年樹木》，他笑說：「唔好話食糊，當做叫糊都好吖。」他又表示今年有不少好歌，例如陳柏宇、周柏豪的作品：「我會畀心機，大家公平競爭，所以我會出力拉票。」他表示多做網上宣傳，以及推出早前與DJ Donald赴澳洲拍攝的旅遊特輯。

提到軒仔的法國餐廳生意，他表示最近請來法國米芝蓮三星的廚師來港助陣。他說︰「因為餐廳嘅座位數目未達米芝蓮標準，希望以米芝蓮廚師嘅廚藝，為顧客帶嚟星級味道。」

採訪︰Pauline

編輯：李潔盈

美術：梁政敏