否認激吻周志文 劉佩玥︰我唔係蠢

劉佩玥（Moon）日前與緋聞男友周志文遊船河時，被同行友人拍得兩人疑似在浮床上激吻；昨日Moon首度開腔回應事件，她直認片中人確是自己和周志文，但否認激吻︰「係角度問題。」

劉佩玥昨日與何廣沛和張曦雯等，到油塘宣傳無綫今晚首播的新劇《跳躍生命線》，Moon明顯有備以來，回應「激吻」事件︰「浮床上面的確係我同阿文，但完全無激咀。我唔係蠢，知道嗰日有好多朋友玩直播，試問又點會眾目睽睽之下咁做？」

跟周志文是否拍拖？Moon說︰「我哋係好朋友，啲人成日話我啲男仔朋友係兵，佢唔係兵，我想低調，唔想成日公開講身邊人嘅關係。」她自言若拍拖感情穩定，會公開跟大家分享，周志文是否已見家長？她笑言︰「留番新年拜年先考慮啦！」

另外，提到陳庭欣回應Moon與周志文的緋聞，似默認兩人拍拖，事後Moon疑不滿陳庭欣，在IG寫「小人論」。昨日Moon解畫︰「大家諗多咗，我有睇佢回應，如果係我，我會話問番當事人，我寫嘅說話唔係針對佢。（覺得陳庭欣多口？）每個人有發言權，佢咁講我會尊重，我哋係好朋友。」

何廣沛撞樣陳家樂

至於被指與陳家樂「撞樣」的何廣沛，自爆曾有市民打賭他究竟是何廣沛還是陳家樂，令他啼笑皆非︰「有人仲會認錯我係黃嘉樂同胡鴻鈞，但就唔會尷尬。」

撰文︰倪小珊

編輯︰李潔盈

美術︰梁政敏