李徐子淇叫生多幾個 城城︰順其自然

郭富城（城城）前晚應邀出席救助兒童基金會慈善晚宴，李徐子淇以籌委會主席兼贊助人身份現身，其他嘉賓還有溫碧霞、林恬兒等。由於最近有傳Moka再度懷孕，對於此事城城卻說︰無可奉告！

早前城城表示喜歡大家庭，記者未及開口送上祝福，他已經搶先回答︰「今日唔講呢啲，有好消息會同大家講，暫時無可奉告。」已有四個子女的李徐子淇立刻向城城表示︰「一個唔夠熱鬧，要生多啲。」城城也禮貌點頭回應︰「係會熱鬧啲，我之前都講過順其自然。」

兩人有趁機交流湊B心得？李徐子淇笑指城城是熟手︰「我都唔記得啦，我嗰啲都大晒。」城城說女兒已經一歲，對他而言仍有好長時間去學習，也明白做爸爸有很大責任。提到工作相當忙碌，如何抽時間陪囡囡？城城笑謂︰「會盡量喺香港工作，希望照顧到家人。」

帶孩子做慈善探訪

談到當晚活動，李徐子淇表示籌款目的是為柬埔寨興建九間學校。問城城會否抽空到柬埔寨探訪？他說︰「想帶埋小朋友去，等佢大啲就帶佢去睇下，等佢嘅成長有正能量，去幫助其他小朋友。」

撰文︰Pauline

編輯︰黃卉彤

美術︰陳超雄