郭晉安爆楊怡險成殺人兇手

《再創世紀》一班演員郭晉安（安仔）、楊怡、林文龍、袁偉豪、鄧佩儀等，昨日到深水埗一間社區中心，跟長者玩遊戲、派禮物，提早歡度中秋節。劇中飾演夫妻的安仔和楊怡，受訪時更互相「指摘」，兩人你一言我一語，充滿笑聲。

安仔表示中秋節當日將在杭州搵真銀，身旁的楊怡立刻質問︰「做乜唔帶埋『老婆』去？」安仔笑騎騎推說下次，但楊怡突然自爆剛從在內地做完騷，安仔聞言反過來笑她不帶「老公」同往。

此時，安仔又爆楊怡最鍾意隨手拿東西打人︰「見到佢拎住隻蕉都唔好企佢隔籬。聽講當年拍《布衣神相》，佢唔使埋位，覺得悶就隨手拎起把劍向麻包袋亂插，點知秦煌就瞓喺堆麻包袋休息，咁啱佢又着住麻質衫，好彩阿怡突然發現有個位突起，係秦煌個肚腩，阿怡即刻縮手，否則殺咗人喇！」安仔笑言早已將楊怡列入黑名單。

對網民意見全部接納

提到內地已播出《再創世紀》大結局，他們都不擔心影響香港觀眾收看意欲，因內地版有少少劇情刪剪了，香港版就原汁原味。而安仔在結局中患腦退化症，他承認自己的角色結局不太好，又笑謂︰「畀阿怡搞到我傻咗囉！」此外，有網民質疑安仔在劇中作為大企業公司董事，卻缺乏財經知識，對此他表示︰「唔知呀，其實太details太複雜都係交番畀幕後工作人員啦，本身對股票唔熟悉，都係照稿讀。不過都多謝觀眾細心去睇，往後不妨再畀多啲意見。」

採訪︰Pauline

編輯︰黃卉彤

美術︰顏玉玲